اسلام آباد 28 جولائي (اے پي پي) د كال 2019م د اګست 5مې نېټې څخه په مقبوضه كشمير كښې د تشدد، ظلم او د بنيادي حقونو تر پښو لاندې كولو يو نوے دور پېل شوے. دا د هندي حكومت لخوا كشميري اولس سره د نوي سياسي منافقت، ناانصافې او د بشري حقونو څخه د سرغړونې يوه بله ورځ وه كله چې د آر اېس اېس پلوي د نرېندر مودي حكومت په مقبوضه كشمير كښې د آرټيكل 370 ختمولو شرمناكه پرېكړه وكړه او دې پرېكړې په هند كښې دننه او بهر ضمېر لرونكې يوه برخه حېرانه كړې. د آر اېس اېس، د مودي فاشسټ او د هغه د پلويانو نه علاوه هر چا ته ناانصافي ښكاري. ځينې خلقو د مودي حكومت دا ناوړه اقدام بې ګناه خلقو سره سياسي بې ايماني ګرځولې او ځينې خلقو دا كشميري اولس سره يوه دهوكه ګڼلې كومه چې د نړيوال قوانين خلاف ورزي ده او يوه غېر قانوني پرېكړه ده. دې اقدام سره هند د كشمير په اړه د ملګرو ملتونو د سلامتي كونسل د قراردادونو خلاف ورزي كړې او مودي او د هغه پلويانو د زمكو قبضه كوونكو مافيا كردار ترسره كړے. د پاكستان جوړېدو نه تر اوسه كشميريانو سره داسې دهوكې، تښتونې، تشدد او قتل عام روان ساتلے شوے. كشميري مشرانو يو ځل بيا د نړۍ قومونو ته غږ كړے چې د كشميريانو د خپلواكې حق لپاره دوي سره ودرېږي او دوي لپاره غږ پورته كړي. د كال 1954م نه تر كال 2019م د اګست تر 5مه نېټه جمو او كشمير د هند په آئين كښې خاص حيثيت لرلو.د هندي آئين د آرټيكل 370 له مخې د جمو او كشمير رياست يو خپلواكه رياست و. هند دې رياست ته د خپل آئين، خپل بېرغ او د دفاع، خارجه چارو او د مواصلاتو نه علاوه په ټولو چارو كښې د خپلواكې اجازه وركړې وه. د دې رياست اوسېدونكو د شهريت ، جائيداد او د بنيادي حقونو په اړه تر جلا قوانين لاندې ژوند تېرولو خو د مودي حكومت آرټيكل 370 ختم كړو او په مقبوضه كشمير كښې ئې د هند آئين په ځائ كړو. د هندي آئين آرټيكل 35 اے د دې رياست اوسېدونكو ته د دائمي اوسېدونكي حيثيت وركړے ؤ او د رياست ټولو اوسېدونكو ته د دائمي اوسېدو سند وركړے شوے ؤ چې ورسره به دوي ته د ملازمت، سكالرشپ پشمول نورې ګټې ترلاسه وې خو تر ټولو لويه ګټه مسقتل اوسېدونكو لپاره دا وه چې يوازې دوي په دې رياست كښې جائيداد خرڅولے او اخستے شو. د مودي بهارتيه جنتا پارټي پشمول د هندو قوم پرستانو لخوا د آرټيكل 35 اے ختمولو مقصد په مقبوضه كشمير كښې د مسلمانو اكثريت ختمول دي. د دې آرټيكل خاتمه هندوانو لپاره په مقبوضه كشمير كښې د استوګنې او راتللو لاره هواروي. د كشميري امرېكن كونسل امريكا اېګزېكټو ډائرېكټر غلام نبي فائي وائي په كشمير كښې حالات ډېر خراب دي ، زه يره لرم چې كه چرته ملګري ملتونه او د اسلامي مرستې تنظيم راوړاندي نه شول نو ټول كشميرے اولس به قتل كړے شي. غلام نبي فائي ووئيل چا ته هم په مقبوضه كشمير كښې د اوسېدو اجازه نشته او څوك په دلته جائيداد نه شي اخستې خو هند د كال 2020م د مئي په 18مه نېټه د ډوميسائل قانون پاس كړو او هغه هندوانو ته ئې لار هواره كړه كوم چې دلته د تېرو اوو كلونو نه ميشته دي چې دغسې ډوميسائل سرټېفكيټس ترلاسه كړے شي . غېر كشميري هندي وګړي چې پكښې هندي سرتېري، د دوي بچي او هند مزدوران شامل دي، اوس دا سند ترلاسه كولے شي خو زه د يو كشميري په توګه دا نه شم ترلاسه كولے ځكه چې زه په دې وروستيو اوو كلونو كښې په كشمير كښې نه يم پاتې شوے. د دې مقصد د مقبوضه كشمير ډېموګرافي بدلول دي ځكه چې هند ته معلومه ده چې كشميريان به هند ته رائې ورنه كړي او نه ئې مني. ده ووئيل اندېښنه ده چې يو څو كلونو كښې به 1.7 مليونه هندي وګړي په مقبوضه كشمير كښې استوګن شي. ځكه مونږ ملګرو ملتونو ته خواست كوو چې هغه كشميريانو سره كړي لوظونه پوره كړي، بايد دوي په دې پوهه شي چې د كشمير شخړه د پاكستان او هند ترمېنځه د لويې جګړې سبب جوړېدے شي او ځكه دا شخړه په سمدستي توګه حل كړے شي. د كل جماعتي حريت كنفرنس لارښود الطاف حسېن واني په مقبوضه كشمير كښې د كرفيو په ځائ كولو او د سياسي مشرانو، سول سوسائټۍ كاركنانو، ماشومانو او د مېرمنو پشمول د زرګونو په شمېر د خلقو د غېر قانوني ګرفتارې غندنه كړې. هغه د هند لخوا په مقبوضه كشمير كښې د ډوميسائل رولز او غېر كشميري وګړو ته په مقبوضه كشمير كښې د استوګنې اجازه وركولو په شان اقدامات مسترد كړي . ده ووئيل د هندي ځواكونو اهلكار او د دوي بچي كوم چې د مقبوضه كشمير په اولس په جبر او بربريت كښې ككړ دي، دوي هم د نوي قانون څخه استفاده كولې شي. ده ووئيل دې اقداماتو سره سره هند په مقبوضه كشمير كښې د تعليم پاليسي هم بدلوي چې دغسې د مقبوضه كشمير تاريخ بيا د سره وليكلے شي او دې سره سره د مېډيا نوې پاليسي هم لري. ده ووئيل د هند د اګست د 5مې نېټې د يو اړخيزه اقدام په ټوله نړۍ كښې غندنه شوې خو هند سره د دې داسې اقدامات روان ساتلي. ده د نړۍ قومومو ته ووئيل چې هغه د ملګرو ملتونو د سلامتي كونسل د قراردادونو له مخې كشميريانو سره كړي لوظونه تر سره كړي.
د كال 2019م د اګست 5مې نېټې څخه په مقبوضه كشمير كښې د تشدد، ظلم او د بنيادي حقونو تر پښو لاندې كولو يو نوے دور پېل شوے
مضمون کا ماخذ : لوٹیریا کا نتیجہ
متعلقہ مضامین
